დედის რძის ბაქტერიოლოგიური გამოკვლევა – მარჯვენა ძუძუ

რძეში ბაქტერიების არსებობა სულაც არ მიუთითებს ინფექციაზე, მაშინაც კი, თუ ბაქტერია რძეში კანიდან არ მოხვედრილა. ბევრ მეძუძურ ქალს, რომელსაც აქვს პოტენციურად პათოგენური ბაქტერია კანზე ან რძეში, არ უვითარდება მასტიტი და მასტიტის მქონე ბევრ ქალს რძეში პათოგენური მიკროორგანიზმები არ აღენიშნება.

გასათვალისწინებელია, რომ მასტიტისა და სარძევე ჯირკვლის აბსცესის დროს ყველაზე გავრცელებული მიკროორგანიზმებია ოქროსფერი სტაფილოკოკი (S aureus) და S epidermidis. ზოგიერთ შემთხვევაში, გვხვდება ნაწლავის ჩხირი და სტრეპტოკოკები (α-, β- და არაჰემოლიზური სტრეპტოკოკები), ეს უკანასკნელი ზოგჯერ ასოცირდება ახალშობილთა სტრეპტოკოკულ ინფექციასთან.

პოპულაციებში, სადაც ტუბერკულოზი ენდემურია, M. tuberculosis შეიძლება იყოს წარმოდგენილი მასტიტის შემთხვევების დაახლოებით 1%-ში, ზოგიერთ შემთხვევაში ასოცირებული ჩვილებში ტუბერკულოზურ ტონზილიტთან.

მიკრობიოლოგიური კვლევის შედეგების საბოლოო ინტერპრეტაციისას აუცილებელია კლინიკისა და სხვა ლაბორატორიული გამოკვლევების მონაცემების გათვალისწინება.

როგორ მოვემზადოთ ტესტისთვის?

დედის რძის ბაქტერიოლოგიური გამოკვლევისთვის საკვლევი მასალის შეგროვება ხორციელდება:

• ანტიბაქტერიული და ანტისოკოვანი საშუალებებით მკურნალობის დაწყებამდე.
• ანტიბაქტერიული და ანტისოკოვანი მედიკამენტებით მკურნალობის კურსის დასრულებიდან – არა უადრეს 7-10 დღის შემდეგ.
• ანტიბაქტერიული და ანტისოკოვანი მკურნალობის ფონზე ექიმის დანიშნულებისამებრ.
• რძის შეგროვებამდე ჩამოიბანეთ მკერდი სარეცხი საპნით და წყლით ან გაიწმინდეთ დეზინფექციური ხელსახოცით, შემდეგ კი გაიმშრალეთ სუფთა, მშრალი პირსახოცით.
• კვლევისთვის საჭიროა რძის შუა ნაკადი (ჯერ გამოიწურეთ რძის პირველი წვეთები, რის შემდეგაც გროვდება საკვლევი მასალა) მინიმუმ 10-15 მლ ოდენობით.
• მასალა გროვდება სტერილურ კონტეინერში.
• რძის შეგროვება ხდება თითოეული მკერდიდან ცალ-ცალკე, ერთჯერადად. სტერილური კონტეინერი უნდა იყოს მონიშნული თითოეული მკერდისთვის (მარცხენა/მარჯვენა მკერდი).
• საკვლევი მასალა ერთი საათის განმავლობაში უნდა იქნას მოტანილი ლაბორატორიაში. თუ ერთი საათის განმავლობაში ვერ შეძლებთ საკვლევი მასალის ლაბორატორიაში მოტანას, მაშინ ის დაუყოვნებლივ უნდა შეინახოთ მაცივარში, +2–8 °С ტემპერატურაზე, მაქსიმუმ 2 საათის განმავლობაში.