პროგესტერონი | ლაბორატორიული კვლევა

პროგესტერონი არის სტეროიდული ჰორმონი, რომელიც გამომუშავდება საკვერცხეებში, თირკმელზედა ჯირკვლებში და ორსულობის დროს პლაცენტაში. საკვერცხეებში მისი სინთეზი სტიმულირდება LH-ით, ორსულობის დროს – hCG-ით, რომელიც პირველ რიგში ასტიმულირებს პროგესტერონის წარმოქმნას ყვითელ სხეულში, შემდეგ კი სინთეზი გადადის პლაცენტაში. პროგესტერონის კონცენტრაცია მჭიდრო კავშირშია ყვითელი სხეულის განვითარებასა და რეგრესიასთან. ფოლიკულურ ფაზაში შესაძლებელია მხოლოდ მინიმალური ოდენობის გამოვლენა. პროგესტერონის მატება შეინიშნება ოვულაციამდე ერთი დღით ადრე და გრძელდება ლუთეინური ფაზის განმავლობაში. პროგესტერონის დონის განსაზღვრა საუკეთესო ტესტია ოვულაციის დასადასტურებლად. ორსულობის დროს, პროგესტერონის დონის თანდათანობითი ზრდა აღინიშნება 9-დან 32 კვირამდე, და ხშირად 100-ჯერ მეტია ვიდრე ორსულობის დაწყებამდე. პროგესტერონის კონცენტრაცია უფრო მაღალია მრავალნაყოფიანი ორსულობის შემთხვევებში. პროგესტერონი საშვილოსნოს ლორწოვან გარსს გარდაქმნის ჯირკვლებით მდიდარ ქსოვილად (სეკრეტორული ფაზა), რაც ხელს უწყობს განაყოფიერებული კვერცხუჯრედის საშვილოსნოში იმპლანტაციას.

ორსულობის დროს პროგესტერონი არამარტო აფერხებს მიომეტრიუმის შეკუმშვას, არამედ ამცირებს მგრძნობელობას შეკუმშვების ფიზიოლოგიურ სტიმულატორებზე, სარძევე ჯირკვლებში (ესტრადიოლთან ერთად) პროგესტერონი ასტიმულირებს ალვეოლების სეკრეტორული ნაწილის საბოლოო ფორმირებას.

როდის ჩავიტაროთ ტესტი პროგესტერონზე?

ქალებში: ოვულაციის გამოვლენა და ლუთეინური ფაზის მონიტორინგი, ყვითელი სხეულის ფორმირება და ფუნქციონირება, ყვითელი სხეულის ფუნქციური მდგომარეობა უნაყოფობის მქონე პაციენტებში, ორსულობის დროს პლაცენტის ფუნქციის განსაზღვრა, საკვერცხეების ფუნქციის ტესტირება, საკვერცხეების სიმსივნეები, საკვერცხეების ცისტები, მოსალოდნელი აბორტი, ნაყოფის სიკვდილი, ორსულთა ტოქსიკოზი.

შრატში პროგესტერონის და ბეტა-HCG-ის ერთად ტესტირება საშვილოსნოს ნორმალური ორსულობისა და საშვილოსონოს გარე ორსულობის დიფერენცირების საშუალებას იძლევა.

როგორ მოვემზადოთ ტესტისთვის?

მასალის აღება ხდება დღის პირველ ნახევარში, მშვიდ მდგომარეობაში. გამოკვლევამდე ერთი დღით ადრე უნდა გამოირიცხოს ცხიმიანი საკვები. ქალებში პროგესტერონის დონის განსაზღვრა სასურველია ჩატარდეს მენსტრუალური ციკლის 21-23-ე დღეს. ტესტის ჩაბარებისას პაციენტმა უნდა მიუთითოს ბოლო მენსტრუაციის თარიღი და ორსულობის ტრიმესტრი.

შედეგების შესაძლო ინტერპრეტაცია

აუცილებელია თავიდან ავიცილოთ რამდენიმე სხვადასხვა მეთოდით და მენსტრუალური ციკლის სხვადასხვა ეტაპზე მიღებული შედეგების შედარება, რადგან შეიძლება მნიშვნელოვნად განსხვავდებოდნენ.

დონის მომატება:

• საშვილოსნოს დისფუნქციური სისხლდენა ლუთეინური ფაზის გახანგრძლივებით;
• მეორადი ამენორეის ზოგიერთი ტიპი;
• ფეტოპლაცენტარული კომპლექსის დისფუნქცია;
• პლაცენტის დაგვიანებული მომწიფება;
• პროგესტერონის ექსკრეციის დაქვეითება თირკმლის უკმარისობის დროს.

დონის კლება:

• შინაგანი სასქესო ორგანოების ქრონიკული ანთება;
• ფოლიკულის პერსისტენცია (ჰიპერესტროგენია);
• საშვილოსნოს ანოვულაციური დისფუნქციური სისხლდენა (პროგესტერონის სეკრეციის დაქვეითება მენსტრუალური ციკლის მე -2 ფაზაში);
• პირველადი და მეორადი ამენორეის სხვადასხვა ფორმები;
• ენდოკრინული გენეზის ორსულობის შეწყვეტის საფრთხე;
• პლაცენტალური უკმარისობა;
• ნაყოფის საშვილოსნოშიდა განვითარების შეფერხება.
• ორსულობის 42-ე კვირაზე (ხანგრძლივი ორსულობა).