Bartonella quintana | ანტისხეულები IgG, IgM (თხრილის ცხელება)

ზოგადი ინფორმაცია

Bartonella quintana  მცირე ზომის, გრამ-უარყოფითი ბაქტერიაა.  ის იწვევს დაავადებას, რომელსაც „თხრილის ცხელება“ ეწოდება მისი აღმოჩენის ადგილის მიხედვით. დაავადების სიმპტომები  1915 წელს პირველი მსოფლიო ომის  ჯარისკაცებს აღმოუჩინეს, რომლებიც თხრილებში და სანგრებში იმყოფებოდნენ. დაავადების გადამტანია ადამიანის სხეულის ტილი. დაავადება ვითარდება მაშინ, როდესაც ტილის მიერ გამოყოფილი ფეკალიები მოხვდება ადამიანის სისხლში. რადგანაც ტილის ნაკბენი ქავილს იწვევს, ქავილის შედეგად დაზიანებული კანიდან ადვილად ხდება ბაქტერიების შეღწევა სისხლში.  ადამიანის სხეულის ტილი განსხვავდება თავის ტილისაგან, რომელიც არ წარმოადგენს  Bartonella quintana -ს გადამტანს. ადამიანის სხეულის ტილი სამოსის და თეტრეულის ნაკეცებში ცხოვრობს და დებს კვერცხებს გასამრავლებლად.

სიმპტომები

„თხრილის ცხელება“ როგორც წესი არ იწვევს სიკვდილიანობას, თუმცა, იმუნოკომპრომეტირებულ პაციენტებში საკმაოდ მძიმედ მიმდინარეობს. ახასიათებს ისეთი გამოვლინებები, როგორიცაა:

• ძვლების და სახსრების ტკივილი
• შემცივნება
• ცხელება
• თავბრუსხვევა
• ღვიძლის და ელენთის გადიდება
• თავის ტკივილი
• გამონაყარი კანზე
• სისუსტე

ცხელების ხანგრძლივობა 4-5 დღეა, თუმცა ასეთი ეპიზოდი დაავადების მიმდინარეობისას შსაძლოა რამდენჯერმე განმეორდეს.

სხვა ბაქტერიულ პროცესებსაც ისეთივე სიმპტომები აქვს, როგორც „თხრილის ცხელებას“, მაგალითად: ლეპტოსპიროზს, ტიფს და სხვა.

Bartonella quintana დიაგნოსტირება არც ისე ადვილია. მნიშვნელოვანია სეროლოგიური კვლევა – იმუნოგლობულინების განსაზღვრით.

გარდა კანის დაზიანებისა, გამომწვევი ვრცელდება სხვა ქსოვილებშიც: ლიმფურ კვანძებში, სისხლში, ელენთაში, ღვიძლში, ძვლის ტვინში, გულის ქსოვილში.

საკვლევი მასალა: ვენური სისხლი

პაციენტის მომზადება: საჭირო არ არის

რეფერალური ნორმები

IgM < 1:12

IgG < 1:64

იმუნოგლობულინ M-ის დადებითი ტიტრი, მიუთითებს მწვავე ინფექციურ პროცესზე.

იმუნოგლობულინ G დადებითი ტესტი – მიუთითებს გადატანილ ინფექციაზე, ან ქრონიკულ მდგომარეობაზე.