ტრიქინელა სპირალისი | IgG ანტისხეულები

ზოგადი ინფორმაცია

ტრიქინელა სპირალისი (Trichinella spiralis) ნემატოდების კლასის პარაზიტია, რომელიც ლარვის სტადიაზე ბინადრობს ველური ძუძუმწოვრების (დათვი, ტახი, მგელი, მელია, მღრღნელები), ასევე ზოგიერთი შინაური ცხოველის, მაგალითად – ღორის კუნთებში.

თერმულად არასაკმარისად დამუშავებული ხორცის საკვებად გამოყენება აავადებს ადამიანსაც. დაავადების კლინიკური გამოვლინება მრავალფეროვანია.

ინფიცირებულ ხორცში პარაზიტი ლარვის სტადიაზეა, რომელიც კუჭის წვენის ზემოქმედებით გამოდის საკვებად იღებული ხორცის ბოჭკოებიდან და წვრილი ნაწლავის ლორწოვანის გავლით მიგრირებს სისხლთან და ლიმფასთან ერთად. პარაზიტი აღწევს კუნთოვან ქსოვილს და ზრდასრული ფორმის მიღწევისას (შეჭრიდან 24 საათში) იწყებს ახალი ლარვების წარმოქმნას. წარმოქმნილი ლარვები ასევე იწყებს მიგრაციას სისხლით და ლიმფით და ვრცელდება ჩონჩხის  სხვა კუნთებში. განსაკუთრებით აქტიურად ზიანდება ის კუნთები რომლებიც უხვადაა სისხლმომარაგებული და მაღალი ფიზიკური დატვირთვით გამოირჩევა: ენის კუნთები, სასულის, თვალის მამოძრავებელი და სხვა.

დაავადების ინკუბაციური პერიოდი 5-10 დღეს შეადგენს რიოს შემდეგაც იწყება სიმპტომები: გულისრევა/ღებინება, ცხელება. ამას ემატება ძლიერი თავის ტკივილი, გამონაყარი, დაზიანებული კუნთების ტკივილი და შეშუპება, ენდოკარდიტი (გულის ამომფენი შრის ანთება) და სხვა. მიალგია და კუნთების შეშუპება შესაძლოა გახანგრძლივდეს.

დაავადების დიაგნოსტიკა ეფუძნება სეროლოგიურ კვლევებს და კუნთის ბიოპტატში პარაზიტის ლარვების აღმოჩენას.

ELISA მეთოდით ანტისხეულების IgG გამოვლენა მაღალმგრძნობიარე ტესტია, რომელიც ავლენს G ანტისხეულებს ინფექციის გადატანიდან 12-14 დღეში.

IgG  ანტისხეულები რჩება წლების განმავლობაში

პაციენტის მომზადება – არ არის საჭირო

საკვლევი მასალა – ვენური სისხლი

ტესტი თვისობრივია

შედეგების ინტერპრეტაცია

სეროლოგიური კვლევის უარყოფითი შედეგი, არ გამორიცხავს გადატანილ ინფექციურ პროცესს. ცრუ-ნეგატიური ან ორაზროვანი მაჩვენებელი ვლინდება  დაავადების ადრეულ ეტაპზე შრატში ანტისხეულების არასაკმარისი კონცენტრაციის გამო. თუ კლინიკური და ლაბორატორიული მონაცემები ერთმანეთს ეწინააღმდეგება, სასურველია კვლევა განმეორდეს 2-4 კვირაში.