B ჰეპატიტის ვირუსის ზედაპირული ანტიგენი (HBsAg) სკრინინგი

ზოგადი ინფორმაცია

B ჰეპატიტის ვირუსის ზედაპირული ანტიგენის სკრინინგ-ტესტი გვაძლევს ინფორმაციას, სისხლში B ჰეპატიტის ვირუსის არსებობაზე. ტესტის დადებითი შედეგი მიუთითებს, რომ ადამიანი ინფიცირებულია B ჰეპატიტის ვირუსით.

B ჰეპატიტის ვირუსის გადაცემა ადამიანიდან ადამიანზე – პარენტერული გზით ხორციელდება – სისხლით ან სქესობრივი კონტაქტით. დაავადების ინკუბაციური (უსიმპტომო) პერიოდი საშუალოდ 70-დან 160 დრემდეა.

ჰეპატიტის B ვირუსის ზედაპირული ანტიგენი (HBsAg) B ვირუსის გარე გარსის კომპონენტია. იმუნური პასუხი სწორედ იმ ანტიგენურ დეტერმინანტზეა მიმართული, რომელიც საერთო აქვს ყველა HBsAg ნაწილაკს.

შრატში ზედაპირული ანტიგენის HBsAg-ის აღმოჩენა მიუთითებს  B ვირუსული ინფექციის არსებობაზე. HBsAg არის ინფექციის პირველი იმუნოლოგიური მარკერი — ის ჩნდება შრატში დაავადების კლინიკური გამოვლინებამდე (მაგალითად სიყვითლის განვითარებამდე) რამდენიმე კვირით ადრე. HbsAg ზედაპირული ანტიგენის აღმოჩენა შესაძლებელია მთელი მწვავე პერიოდის – 1-4 თვის განმავლობაში, რის შემდეგაც ის ხდება ნეგატიური.

თუ B ჰეპატიტის ვირუსის ზედაპირული ანტიგენი პერსისტირებს (რჩება) 6 თვეზე მეტხანს, ვითარდება ქრონიკული B ვირუსული ჰეპატიტი. ინფიცირებულ მოზრდილთა  5-10%-ში და ახალშობილთა 90%-ში ვირუსის ელიმინაცია ვერ ხდება და ვითარდება ქრონიკული ჰეპატიტი, რაც საბოლოოდ შესაძლოა ციროზით და იშვიათ შემთხვევებში ჰეპატოცელულური კარცინომით პროგრესირდეს.

ინფექციის ვერტიკალური ხაზით გადაცემა – ორსულიდან ნაყოფზე – ხდება HbsAg ანტიგენ-პოზიტიურ ორსულთა 20%-ში და იმ ორსულთა 60%-ში, რომლებიც ორსულობისას დაინფიცირდნენ B ჰეპატიტის ვირუსით.