ასპერგილუსი Aspergilus Fumigatus | ანტისხეულები IgA, IgM, IgG

ზოგადი ინფორმაცია

ასპერგილუსის გვარის სოკოების 200-ზე მეტი სახეობა არსებობს, თუმცა დაახლოებით 20-მდე სახეობაა პათოგენური ადამიანისთვის, მათ შორის ყველაზე აგრესიულია Aspergilus Fumigatus.  ასპერგილუს ფუმიგატუსი ვრცელდება სპორებით, რომლებიც თვეების განმავლობაში მდგრადია გარემო ფაქტორების მიმართ, როგორიცაა: სიცხე, გაუწყლოება, ქიმიური ზემოქმედება, გამოსხივება და სხვა.

ნორმალური იმუნური სტატუსის მქონე პირებს იშვიათად უვითარდებათ სოკოვანი ინფექცია, თუმცა იმუნოკომპრემეტირებულ ადამიანებს ასპერგილოზის განვითარების მაღალი რისკი აქვთ. ასპერგილოზის განვითარების მთავარი რისკ-ფაქტორია ნეიტროპენია (ნეიტროფილური ლეიკოციტების დეფიციტი სისხლში), რასაც შესაძლოა ადგილი ქონდეს სხვადასხვა პათოლოგიების დროს:

• მწვავე ლეიკემია
• სოლიდური სიმსივნეები
• ორგანოების გადანერგვა
• ძვლის ტვინის გადანერგვა
• პირველადი იმუნოდეფიციტი
• ფილტვის ქრონიკული დაავადებები: ტუბერკულოზი, ცისტური ფიბროზი, ქრონიკული ბრონქიტი და სხვა.

ასპეგილოზის  დიაგნოსტიკა ხორციელდება მისი უჯრედული გლიკოპროტეინის (გალაქტომანან-ანტიგენი) მიმართ ანტისხეულების გამოვლენით.

სეროლოგიური ტესტები განსაკუთრებით მნიშვნელოვანია ლოკალური ასპერგილური ინფექციების  და ალერგიული ბრონქოპულმონური  ასპერგილოზის (ABPA) სადიაგნოსტიკოდ.

როდის ტარდება კვლევა?

• ინვაზიური ასპერგილოზის დიაგნოსტიკის და მკურნალობის ეფექტურობის შესაფასებლად ძირითადად გამოიყენება ანტიგენის კვლევა
• ალერგიული ბრონქოპულმონური ასპერგილოზის (ABPA) ან ასპერგილომის (ასპერგილომა – სხეულის ღრუებში სოკოვანი წარმონაქმნი) მქონე პაციენტებში დიაგნოსტიკა ძირიტადად ხდება ანტისხეულების კვლევით.

პაციენტის მომზადება: არ არის საჭირო

საკვლევი მასალა: ვენური სისხლი

შედეგების ინტერპრეტაცია

ასპერგილომის მქონე პაციენტთა 90%-ს და ასპერგილოზური ალერგიის მქონე პაციენტთა 70%-ს აღენიშნება ანტი-ასპერგილური ანტისხეულები (IgA, IgM, IgG). ეფექტური მკურნალობის შემდეგ ანტისხეულების ტიტრი მცირდება.

შემთხვევათა 7-14%-ში შესაძლოა გამოვლინდეს ანტისხეულების ცრუ-დადებითი პასუხი. ამის მიზეზია:

• ზოგიერთი საკვები – პასტა, ბრინჯი და სხვა, რომელიც შეიცავს გალაქტომანან-ანტიგენს
• ნაწლავის კედლის განვლადობის ცვლილება სხვადასხვა დაავადების ან ქიმიოთერაპიის შედეგად
• ნახევრადსინთეზური ანტიბიოტიკები – პიპერაცილინი, ამოქსიცილინი და აუგმენტინი (ისინი ბუნებრივი პენიცილინების წარმოებულია) შესაძლოა იწვევდეს ანტიგენებისადმი ჯვარედინ აქტივობას და გამოიწვიოს ცრუ დადებითი პასუხი.

სისტემური ასპერგილოზების მქონე პაციენტების სეროლოგიური კვლევის შედეგები ხშირად ნეგატიურია, რაც კვლევის დამატებითი მეთოდების გამოყენებას მოითხოვს.