ხახის ნაცხის ბაქტერიოლოგიური გამოკვლევა

ფარინქსის (ხახის) ლორწოვანი გარსის ადგილობრივ მიკროფლორას მიეკუთვნება: ნეისერია, დიფტეროიდები, ალფა-ჰემოლიზური და გამა-ჰემოლიზური სტრეპტოკოკები, მიკოპლაზმები, კოაგულაზა-უარყოფითი სტაფილოკოკები, მორაქსელა, ბაქტერიოიდები, ბორელია, ტრეპონემა და სხვა.

ფარინგიტების 70%-ის ეტიოლოგიური ფაქტორი ვირუსია. პროცესი ხასიათდება სასუნთქი გზების ეპითელიუმის დაზიანებით და სინუსების ან ევსტაქის მილის შეგუბებითი ობსტრუქციით, რაც ხელს უწყობს დამატებით ბაქტერიული ინფექციის განვითარებას ადგილობრივი მიკროფლორით. ბაქტერიული ფარინგიტის ყველაზე ხშირი გამომწვევია Streptococcus pyogenes (A ჯგუფის ბეტა-ჰემოლიზური სტრეპტოკოკი) და ის მოქმედებს როგორც ბაქტერიული აგენტი, რომელმაც შეიძლება განაპირობოს ფარინგიტის მძიმე გართულებები:  სინუსიტი, შუა ოტიტი, პარატონზილარული აბსცესი და ა.შ. ასევე ფარინგიტს იწვევენ C და G ჯგუფის ბეტა-ჰემოლიზური სტრეპტოკოკები. ბეტა ჰემოლიზური სტრეპტოკოკების (A, C და G ჯგუფი) მიერ გამოწვეული ფარინგიტების შესაძლო გართულებას წარმოადგენს ასევე რევმატიზმი.

ამ გართულებების თავიდან ასაცილებლად, აუცილებელია ხახის ნაცხის ბაქტერიოლოგიური გამოკვლევა, რაც ხელს უწყობს სწორ დიაგნოსტიკასა და ანტიბიოტიკოთერაპიის დროულად დაწყებას.

როგორ მოვემზადოთ ტესტისთვის/მასალის შეგროვების წესები

ხახის ნაცხის ბაქტერიოლოგიური გამოკვლევისთვის საკვლევი მასალის შეგროვება ხორციელდება:

• ანტიბაქტერიული და ანტისოკოვანი საშუალებებით მკურნალობის დაწყებამდე.
• ანტიბაქტერიული და ანტისოკოვანი მედიკამენტებით მკურნალობის კურსის დასრულებიდან – არა უადრეს 7-10 დღის შემდეგ.
• ანტიბაქტერიული და ანტისოკოვანი მკურნალობის ფონზე ექიმის დანიშნულებისამებრ.

• ნაცხის აღება მიზანშეწონილია დილით უზმოზე (კვლევამდე არ გაიხეხოთ კბილები), ან ჭამიდან 1.5-2 საათის შემდეგ.
• მნიშვნელოვანია, ნაცხის აღებამდე არ გამოიყენოთ პირის ღრუს ანტისეპტიკური საშუალებები.