სისხლის ჯგუფისა და რეზუსის განსაზღვრა

სისხლის ჯგუფი – AB0 სისტემა, ასახავს ანტიგენების არსებობას ან არარსებობას სისხლის წითელი უჯრედების ზედაპირზე და ანტისხეულებს სისხლის პლაზმაში.

ადამიანის სისხლი, რომელშიც სისხლის წითელი უჯრედების ზედაპირზე წარმოდგენილია A ანტიგენი მიეკუთვნება მეორე ჯგუფს – A (II); სისხლი, რომელშიც წარმოდგენილია B ანტიგენი, მიეკუთვნება მესამე ჯგუფს – B (III). თუ სისხლის წითელ უჯრედებზე წარმოდგენილია ორივე, A და B ანტიგენი, იგი მიეკუთვნება მეოთხე ჯგუფს – AB (IV). თუ სისხლის წითელი უჯრედების ზედაპირზე არ არის გამოვლენილი ასეთი ანტიგენები, სისხლი მიეკუთვნება პირველ ჯგუფს – 0 (I).

რეზუს (Rh) ფაქტორი არის ცილა, რომელიც ზოგიერთი ადამიანის სისხლის წითელი უჯრედების ზედაპირზე გვხვდება. იმ ადამიანის სისხლს, რომელშიც ეს ცილა გვხვდება, ეწოდება Rh+ (რეზუს დადებითი) სისხლი, ხოლო სისხლს, რომელშიც ეს ანტიგენი არ გვხვდება – Rh- (რეზუს უარყოფითი) სისხლი. ამ ცილის არსებობა ან არარსებობა ინდივიდუალური თვისებაა და არა პათოლოგია.

როდის ჩავიტაროთ ტესტი სისხლის ჯგუფისა და რეზუსის განსაზღვრის მიზნით?

სისხლის ჯგუფის განსაზღვრისთვის ტესტის ჩატარება რეკომენდებულია:

სისხლის გადასხმამდე – მათ შემთხვევაში, ვისაც სჭირდება სისხლის გადასხმა და ასევე დონორების შემთხვევაშიც.

სისხლის და მისი კომპონენტების ტრანსფუზია ყველაზე ხშირად საჭიროა შემდეგ სიტუაციებში:

• მძიმე ანემია;
• სისხლდენა, ოპერაციის დროს ან მის შემდეგ;
• მძიმე დაზიანებები;
• ნებისმიერი წარმოშობის მასიური სისხლის დანაკარგი;
• ონკოლოგიური დაავადებები და ქიმიოთერაპიის გვერდითი მოვლენები;
• კოაგულაციის დარღვევები, კერძოდ, ჰემოფილია;
• ინვაზიური ან ქირურგიული ჩარევის დაწყებამდე;

რეზუს ფაქტორს განსაზღვრავენ შემდეგ შემთხვევებში:

• დედისა და ბავშვის პრენატალური და მშობიარობის პერიოდის იმუნოლოგიური მონიტორინგი;
• ორგანოთა გადანერგვებში AB0 ჯგუფების თავსებადობისთვის;
• ორსულობის დროს დედისა და ბავშვის სისხლის თავსებადობის დასადგენად;
• ოპერაციამდე; ტრანსფუზიამდე, სისხლის ან მისი კომპონენტების მომზადებაში (დონორები, რეციპიენტი).

როგორ მოვემზადოთ ტესტისთვის?

კვლევისთვის წინასწარი მომზადება საჭირო არ არის

საკვლევი მასალა

ვენური სისხლი

შედეგების შესაძლო ინტერპრეტაცია

• 0 (I) არის პირველი ჯგუფი;
• A (II) – მეორე ჯგუფი;
• B (III) – მესამე ჯგუფი;
• AB (IV) – მეოთხე სისხლის ჯგუფი.
• Rh (+) – რეზუს დადებითი სისხლი;
• Rh (-) – რეზუს უარყოფითი სისხლი.