B ჰეპატიტის ვირუსის e ანტიგენი (HBeAg) | ანტისხეულები

ზოგადი ინფორმაცია

B ჰეპატიტის ვირუსის E ანტიგენი მცირე ზომის პოლიპეპტიდია, რომელიც თავისუფალი სახით არსებობს ინფიცირებული პაციენტების შრატში,  HBV ინფექციის ადრეულ სტადიაზე, S ზედაპირული ანტიგენის გამოჩენის შემდეგ.  ვირუსის აქტიური გამრავლების ფაზაში S და E ანტიგენების დონე სწრაფად იმატებს. HBeAg E ანტიგენის არსებობა შრატში შესაბამისობაშია ვირუსული პროცესის აქტივობასთან, შრატში ვირიონების (ვირუსის გენომის შემცველი პატარა ნაწილაკები)  რაოდენობასთან და ჰეპატოციტებში – ძირითადი ანტიგენის არსებობასთან.

მწვავე პროცესის დასრულებასთან ერთად E ანტიგენის დონე მცირდება და საბოლოოდ ქრება, მაშინ როცა ამ დროს ჩნდება  E ანტიგენის მიმართ განვითარებული ანტისხეულები (ანტი-HBe). E ანტიგენის საწინააღმდეგო ანტისხეულები შრატში მრავალი წლის მანძილზე რჩება, მწვავე პროცესის დასრულების შემდეგაც.

B ჰეპატიტის ვირუსის მტარებლებში და ქრონიკული ჰეპატიტით პაციენტებში პოზიტიური E ანტიგენი მიუთითებს ვირუსის გამრავლებაზე და  აქტიურ ინფექციურ პროცესზე. E ანტიგენის ნეგატიური მაჩვენებელი გულისხმობს ვირუსის აქტივობის და გამრავლების ან მინიმალურ დონეს ან სრულ არარსებობას.