ჰელიკობაქტერია პილორი (განავალი)

ჰელიკობაქტერია პილორი (Helicobacter pylori) არის გრამუარყოფითი, სპირალური ბაქტერია, რომელიც სახლობს კუჭის ლორწოვანი გარსის კრიპტებში.

Helicobacter pylori-ით გამოწვეული ინფექცია ქრონიკული გასტრიტისა და პეპტიური წყლულის ძირითადი მიზეზია; ბოლო წლების ეპიდემიოლოგიურმა კვლევებმა ასევე დაადასტურა პერსისტირებადი ინფექციის კავშირი კუჭის კიბოს გაზრდილ რისკთან. გარდა ამისა, ეს ბაქტერია პასუხისმგებელია MALT ლიმფომების უმეტეს შემთხვევებზე (ჰემატოლოგიური ნეოპლაზმების ფორმები, რომლებიც ხასიათდებიან საჭმლის მომნელებელ ლორწოვანთან ასოცირებულ ლიმფოიდურ ქსოვილში უჯრედების გამრავლებით).

ინფექციის ძირითად რეზერვუარს წარმოადგენენ H. pylori-ის მატარებელი პირები და ინტერპერსონალური კონტაქტი არის გადაცემის ყველაზე მნიშვნელოვანი გზა, ძირითადად ადრეულ ბავშვობაში. სხვა გადაცემის გზა შეიძლება იყოს, მაგალითად, განვითარებად ქვეყნებში – წყალი.

ინფექცია ხშირ შემთხვევაში უსიმპტომოდ მიმდინარეობს. თუმცა, კლინიკური გამოვლინებების თანხლებისას პაციენტებს ჩვეულებრივ აღენიშნებათ დისპეფსიური სიმპტომები: დისკომფორტი და ტკივილი მუცლის ღრუს არეში, გულისრევა, წვის შეგრძნება, რეგურგიტაცია და სისავსის შეგრძნება ჭამის შემდეგ.

ჰელიკობაქტერია პილორიზე ტესტირება გამოიყენება საჭმლის მომნელებელ ტრაქტში ბაქტერიების გამოვლენის, ინფექციის დიაგნოსტირებისა და მკურნალობის მონიტორინგის მიზნით.

არსებობს რამდენიმე სხვადასხვა ტიპის ტესტი, მათგან ერთ-ერთია, ჰელიკობაქტერია პილორის ანტიგენის განსაზღვრა განავალში.

როდის ჩავიტაროთ ტესტი?

კვლევა ტარდება მაშინ, როდესაც გაქვთ საჭმლის მომნელებელ ტრაქტთან დაკავშირებული შემდეგი ნიშნები და სიმპტომები:

• მუცლის მოვლითი ტკივილი;
• აუხსნელი წონაში კლება;
• საჭმლის მონელების პრობლემა;
• სისავსის ან შებერილობის შეგრძნება;
• გულისრევა;
• გულძმარვა და სხვ.

ზოგიერთ ადამიანს შეიძლება ჰქონდეს უფრო სერიოზული ნიშნები და სიმპტომები, რომლებიც საჭიროებენ სასწრაფო სამედიცინო დახმარებას, მათ შორის მწვავე, უეცარი, მუდმივი კუჭის ტკივილი; სისხლიანი ან შავი განავალი; სისხლიანი ღებინება ან ღებინება, რომელიც ჰგავს ყავის ნალექს.

კვლევა შეიძლება ასევე დაინიშნოს მკურნალობის კურსის დასრულებიდან 4-6 კვირის შემდეგ, რათა დადასტურდეს, რომ ინფექცია განიკურნა.

როგორ მოვემზადოთ ტესტისთვის/მასალის შეგროვების წესი

საკვლევ მასალას წარმოადგენს განავალი.

ტესტისთვის სპეციალური მომზადება საჭირო არ არის. თუმცა, შესაძლოა საჭირო გახდეს ანტიბიოტიკებით, ანტაციდებით ან ბისმუტის პრეპარატებით მკურნალობისგან (ასეთის არსებობის შემთხვევაში) თავის შეკავება ტესტირებამდე 14 დღის განმავლობაში.

კვლევისთვის განავლის შეგროვების წესები

• კვლევისთვის განავლის შეგროვებამდე, ჯერ უნდა შეიძინოთ სპეციალური კონტეინერი.
• განავლის ნიმუში გროვდება სუფთა კონტეინერში.
• ნიმუში არ უნდა იყოს დაბინძურებული შარდით ან წყლით (განავლის შეგროვებამდე უნდა მოშარდოთ).
• ნიმუშების აღება ხდება ფეკალური მასის შუა ნაწილიდან კოვზით, რომელიც მოთავსებულია სპეციალურ ჭურჭელში ფეკალური მასალის შესაგროვებლად. ანალიზისთვის საკმარისია ჭურჭლის მოცულობის 1/3 ან 10-15გ განავალი.
• კონტეინერი დაუყოვნებლივ უნდა მიიტანოთ ლაბორატორიაში.

შედეგების შესაძლო ინტერპრეტაცია

ტესტის დადებითი შედეგი (განავალში აღინიშნება ჰელიკობაქტერია პილორის ანტიგენი)  მიუთითებს იმაზე, რომ თქვენი ნიშნები და სიმპტომები სავარაუდოდ გამოწვეულია ამ ბაქტერიით გამოწვეული პეპტიური წყლულით.

ტესტის უარყოფითი შედეგი (განავალში არ აღინიშნება ჰელიკობაქტერია პილორის ანტიგენი)  ნიშნავს, რომ ნაკლებად სავარაუდოა, რომ გქონდეთ H. Pylori ინფექცია და თქვენი ნიშნები და სიმპტომები შეიძლება იყოს სხვა მიზეზით გამოწვეული. თუ სიმპტომები ნარჩუნდება, შეიძლება ჩატარდეს დამატებითი ტესტირება, მათ შორის უფრო ინვაზიური – ქსოვილის ბიოფსია, რათა დარწმუნებით გამოირიცხოს ინფექცია.

რესურსები

https://www.synevo.ro/shop/antigen-helicobacter-pylori-din-materii-fecale/

https://www.testing.com/tests/helicobacter-pylori-h-pylori-testing/