პროთრომბინის დრო, ინდექსი, საერთაშორისო ნორმალიზებული შეფარდება

პროთრომბინის დრო (წმ) – PT

კოაგულაციის სისტემის მდგომარეობის მნიშვნელოვანი მაჩვენებელია. ის წარმოდგენას გვიქმნის კოაგულაციის გარეთა გზაში (external coagulation pathway) ჩართული ფაქტორების ( VII, X, V, I, II ) აქტივობაზე. VII, X, V, I, II ფაქტორები ღვიძლში სინთეზირდება და პროცესი საჭიროებს K ვიტამინის არსებობას.

ანალიზისას ისაზღვრება დრო (წამებში), რომლის განმავლობაშიც ანალიზისთვის აღებულ სისხლის პლაზმაში არააქტიური პროთრომბინისგან წარმოიქმნება თრომბის წარმომქმნელი ცილა – თრომბინი.

მას შეუძლია გამოავლინოს როგორც ჰიპერკოაგულაცია, ასევე ჰიპოკოაგულაცია.

პროთრომბინის დრო იზომება წამებში, მაგრამ შეიძლება გამოიხატოს სხვადასხვა გზით: წამი (წმ.), პროთრომბინის ინდექსი პროცენტებში (%) და INR (საერთაშორისო ნორმალიზებული თანაფარდობა).

პროთრომბინის ინდექსი – PI

ანალიზისას ისაზღვრება პროთრომბინის აქტივობა %-ში.

საერთაშორისო ნორმალიზებული თანაფარდობა (INR)

გამოკვლევისას ისაზღვრება პროთრომბინული ინდექსისა (PI) და პროთრომბინის დროის (PT) ურთიერთშეფარდება.

შედარებითია სხვადასხვა ლაბორატორიებს შორის და მისი მნიშვნელობის მიხედვით ექიმს შეუძლია განსაზღვროს გამოწერილი ანტიკოაგულანტების დოზა და მათი მიღების ინტერვალი.

INR სასარგებლოა მხოლოდ ანტიკოაგულანტური თერაპიისსას და არ გამოიყენება სხვა მიზეზების გამო გახანგრძლივებული პროთრომბინის დროის მქონე პაციენტების დიაგნოსტიკისა და მკურნალობისთვის.

როგორ მოვემზადოთ ტესტის გასაკეთებლად?

ანალიზისთვის სისხლის აღება აუცილებელია უზმოდ, ბოლო 12 საათის განმავლობაში მედიკამენტების მიღების გარეშე. პაციენტმა უნდა მოგვაწოდოს ინფორმაცია, ღებულობს თუ არა მედიკამენტებს, რომლებიც გავლენას ახდენენ სისხლის შედედებაზე.