ზოგადი ინფორმაცია

CIN2+ იმუნოციტოქიმიური დიაგნოსტიკა

იმუნოციტოქიმიური CIN2+ დიაგნოსტიკა ორმაგი პროგნოზული სადიაგნოსტიკო ტესტია, რომელიც აფასებს p16INK4a და  Ki67 ცილების უჯრედულ ექსპრესიას ცერვიკო-ვაგინალურ (საშვილოსნოს ყელისა და საშოს ლორწოვანის) ნიმუშში. ტესტის სენსიტიურობა 94%, ხოლო სპეციფიკურობა 97% შეადგენს –  საშვილოსნოს ყელის ეპითელიუმის მაღალი ხარისხის რისკის შეფასებაში (CIN2+).

p16INK4a ცილა მონაწილეობს  უჯრედული ციკლის და უჯრედების გაყოფის კონტროლირების პროცესში  (ანელებს უჯრედის გაყოფის პროცესს ინტერფაზის G1 ფაზიდან  S ფაზამდე). ამგვარად, ნორმალურ პირობებში p16INK4a ცილა ასრულებს სიმსივნის დამთრგუნველ ფუნქციას, ბლოკავს პაპილომავირუსით ინფიცირებული ცერვიკალური უჯრედების უკონტროლო გამრავლებას. პერსისტენტული HPV ინფექციების დროს წარმოიქმნება E6 და E7 ონკოპროტეინები, რომლებიც ბლოკავს სიმსივნის დამთრგუნველ გენებს და მათ მიერ სინთეზირებულ ცილებს, რაც იწვევს საბოლოოდ გენომურ არასტაბილურობას და დაზიანებული ეპითელური უჯრედების უკონტროლო გამრავლებას.

E7 ონკოპროტეინი (ონკოცილა) იწვევს p16INK4a ცილის დაგროვებას, რომლის აღმოჩენაც იმუნოციტოქიმიური მეთოდითაა შესაძლებელი.

p16INK4a ცილის ჭარბწარმოქმნა  HPV-ინფიცირებული უჯრედების სიმსივნური გარდაქმნის დასაწყისის მარკერია და შეესაბამება საშვილოსნოს ყელის  კიბოსწინარე მდგომარეობას.

Ki67 ცილა უჯრედის პროლიფერაციის (გამრავლების) მარკერია და წარმოიქმნება გამრავლების პროცესში მყოფი  უჯრედის ბირთვში. ერთსა და იმავე უჯრედში  p16INK4a და  Ki67 ცილების ჭარბად წარმოქმნა მიუთითებს უჯრედული ციკლის დარღვევაზე და პაპილომავირუსის (HPV) მაღალონკოგენურ აქტივობაზე. აუცილებელია ასეთი პაციენტის კოპლოსკოპიური შეფასება.

CIN2+ იმუნოციტოქიმიური კვლევის რეკომენდაცია  ეძლევა:

• ყველა პაციენტს რომელთაც გამოუვლინდათ საშვილოსნოს ყელის დაბალი ხარისხის ინტრაეპითელური დაზიანება
• პაციენტებს HPV მაღალი რისკის ტიპების არსებობით

პაციენტის მომზადება

• ნიმუშის აღებამდე 24-48 საათის განმავლობაში აკრძალულია: სქესობრივი კავშირი, ვაგინალური შხაპის, მანიპულაციების ჩატარება,ვაგინალური  სამკურნალო საშუალებების, დეზინფექტანტების, ლუბრიკანტების გამოყენება.
• ნიმუშის შეგროვება უნდა მოხდეს მენსტრუალურ სისხლდენებს შორის პერიოდში. ინფექციის არსებობისას, ნიმუშის აღება ხდება მკურნალობის კურსის შემდეგ.
• სამედიცინო-ქირურგიული პროცედურების საჭიროების შემთხვევაში ვაგინალური  ნიმუშის აღება უნდა მოხდეს ხელით გასინჯვამდე, ან კოლპოსკოპიის ჩატარებიდან 24 საათში. ელექტრორეზექციის, პოლიპექტომიის ან მშობიარობის შემდეგ პროცედურის ჩატარებამდე შუალედი 1,5-3 თვე უნდა იყოს.

მასალის აღება

ნიმუშის შეგროვება ხორციელდება სითხეზე დაფუძნებული ციტოლოგიური კვლევისათვის განკუთვნილი ფლაკონის და ჯაგრისის გამოყენებით, რომელიც მასალის უდანაკარგოდ შეგროვებისა და დაუზიანებლად ტრანსპორტირების შესაძლებლობას იძლევა.

იმუნოციტოქიმიური კვლევა ხორციელდება სრულად ავტომატიზებულ სისტემაში, რომელიც ორივე ცილს ერთდროული გამოვლენის საშუალებას იძლევა.

ნიმუშის დამუშავების სტადიები მოოიცავს ანტიგენის გაშიშვლებას, ენდოგენური პეროქსიდაზების (ფერმენტების) დეაქტივირებას, ინკუბაციას და ორი იმუნოციტოქიმიური რეაქციის გაშვებას, რომლის ვიზუალიზაცია ხორციელდება  ორი სხვადასხვა ფერით. დამუშავებული სლაიდების შესწავლა ხორციელდება ოპტიკური მიკროსკოპით, მიუხედავად უჯრედის მორფოლოგიისა.

შედეგების ინტერპრეტაცია

CIN2+ იმუნოციტოქიმიური ტესტის  (CINtec® PLUS) შედეგი ითვლება პოზიტიურად, როდესაც თუნდაც ერთ უჯრედში აღინიშნება p16INK4a და Ki67 ცილების ერთდროული ექსპრესია.

p16INK4a ცილის ჭარბი ექსპრესია აღინიშნება ყავისფერი შეფერილობით, Ki-67 ცილის ჭარბი ექსპრესია კი – წითელი შეფერილობით. ორმაგი ციტოქიმიური სიგნალი (დაზიანების ორივე ტიპის აღმნიშვნელი შეფერილობების გამოვლენა)

ორმაგი იმუნოციტოქიმიური სიგნალი (რომელიც ორი ფერითაა გამოხატული) მიუთითებს უჯრედის სასიცოცხლო ციკლის დისრეგულაციაზე და გენომში განვითარებულ ცვლილებებზე, რაც მაღალი რისკის დაზიანების ინდიკატორია.