გამაგლუტამილტრანსფერაზა (GGT)

როდის ჩავიტაროთ ტესტი?

GGT არის ჰეპატობილიარული სისტემის (ღვიძლის, სანაღვლე გზების) დაზიანების დიაგნოსტიკური მარკერი და განისაზღვრება შემდეგი დაავადებების დროს:

• A, B, C, E ჰეპატიტის ვირუსებით გამოწვეული მწვავე ვირუსული ჰეპატიტი;
• სხვა ვირუსებით გამოწვეული მწვავე ჰეპატიტი – მაგ. EBV, CMV;
• ქრონიკული ჰეპატიტი;
• ღვიძლის ციროზი;
• ნაღვლის ბუშტის დაავადება;
• ქოლეცისტიტი და ქოლანგიტი;
• სიყვითლე – GGT წარმოადგენს მნიშვნელოვან მაჩვენებელს სიყვითლის გამომწვევი მიზეზის დასადგენად – ღვიძლის დაავადება ან ნაღვლის სადინრების ობსტრუქცია კენჭით (ქვით), ღვიძლის სიმსივნით, ან პანკრეასის მიერ;
• ღვიძლის აუტოიმუნური დაავადებები;
• სანაღვლე გზების აუტოიმუნური დაავადებები – პირველადი ბილიარული ციროზი, პირველადი სკლეროზული ქოლანგიტი;
• ალკოჰოლის ქრონიკული გამოყენება ბოროტად – GGT ალკოჰოლის ხანგრძლივი მოხმარების ყველაზე მგრძნობიარე მაჩვენებელია.
• გრძელვადიანი თერაპია ისეთი მედიკამენტებით, როგორიცაა ფენობარბიტალი, ფენიტოინი და სხვა.

ტუტე ფოსფატაზა (ALP), ალანინ ამინოტრანსფერაზა (ALT), ასპარტატ ამინოტრანსფერაზა (AST), ბილირუბინის მთლიანი და პირდაპირი ფრაქცია ჩვეულებრივ განისაზღვრება GGT-სთან ერთად.

GGT-ის მნიშვნელობა უფრო ინფორმაციულია ბილიარული სისტემის დაავადებებისთვის (ქოლეცისტიტი, ქოლანგიტი, ობსტრუქციული სიყვითლე), ვიდრე ALP-ს მნიშვნელობა, რადგან ის უფრო ადრე მატულობს და უფრო დიდხანს ნარჩუნდება.