ბარბიტურატები (შარდი)

ზოგადი ინფორმაცია

ბარბიტურატები ბარბიტურმჟავას წარმოებული სედატიური მოქმედების, ჰიპნოტური ნივთიერებებია, რომლებიც თრგუნავს ცენტრალური ნერვული სისტემის ფუნქციონირებას. მოქმედების დროის მიხედვით ამ ჯგუფს ყოფენ ძალიან ხანმოკლე, ხანმოკლე, საშუალო ხანგრძლივობის და ხანგრძლივი მოქმედების ბარბიტურატებად.

მედიკამენტების ეს ჯგუფი ხასიათდება ანტიეპილეფსიური, შფოთვის მომხსნელი და საძილე მოქმედებითაც.

ბარბიტურატები ადვილად შეიწოვება საჭმლის მომნელებელი ტრაქტიდან სისხლის ნაკადში. მათი კონცენტრაცია და განაწილება ქსოვილებში, დამოკიდებულია ცხიმში ხსნადობის ხარისხზე და ცილებთან შეკავშირების უნარზე.

ბარბიტურატების უმეტესობა მეტაბოლიზდება ღვიძლში  გვერდითი ჯაჭვის ოქსიდაციის, აზოტოვანი დეალკილირების და/ან თიობარბიტურატის დესულფურიზაციის მეშვეობით.

ღვიძლში მიმდინარე მეტაბოლიზმის ხარისხი დამოკიდებულია მედიკამენტის ტიპზე: სეკობარბიტალი განიცდის ინტენსიურ ოქსიდაციას ფარმაკოლოგიურად არააქტიურ მეტაბოლიტებად, ხოლო  ბარბიტალი და ფენობარბიტალი კი უცვლელად გამოიყოფა შარდში.

ბარბიტურატების ჭარბი მოხმარება იწვევს მოძრაობის კოორდინაციის, აღქმის, აზროვნების პროცესების დარღვევას, ეიფორიას, ცნობიერების ცვლილებებს, სტუპორს და კომას. ბარბიტურატების კომბინირება ალკოჰოლთან, ოპიატებთან და ცნს-ის სხვა დეპრესანტებთან სუნთქვის ცენტრის დათრგუნვას და ზოგჯერ სიკვდილსაც იწვევს.

საკვლევი მასალა: შარდი

რეფერალური ნორმა: ნეგატიური

პოზიტიური მაჩვენებელი მიუთითებს შარდში აღნიშნული ნივთიერების არსებობაზე