ამინომჟავები (სისხლი)

ჯანმრთელ ადამიანებში, ამინომჟავების წყარო საკვებიდან მიღებული ცილაა. მიუხედავად იმისა, რომ ამინომჟავების უმეტესობა ორგანიზმში წარმოიქმნება, არსებობს რამდენიმე ამინომჟავა, რომელთა სინთეზიც ძუძუმწოვრების მიერ არ ხდება და შესაბამისად ისინი მიიჩნევიან შეუცვლელ ამინომჟავებად, რომლებიც უზრუნველყოფენ ნორმალურ ზრდასა და ჯანმრთელობის შენარჩუნებას.

კუჭ-ნაწლავის ტრაქტის პროტეოლიზური ფერმენტები ანადგურებენ საკვებიდან მიღებულ ცილებს და გამოყოფენ ამინომჟავებს, რომლებიც შეიწოვებიან მლივ ნაწლავში და რომლებიც მონაწილეობენ ორგანიზმის ამინომჟავების მარაგის შექმნაში. ღვიძლი და სხვა ქსოვილები იყენებენ ამ მარაგს პლაზმისა და უჯრედშიდა ცილების სინთეზისთვის.

სისხლში არსებული ამინომჟავები იფილტრება თირკმლის გლომერულებში, მაგრამ ჩვეულებრივ რეაბსორბირდება მილაკოვან დონეზე. ამიტომ, სისხლში ამინომჟავების მაღალ დონეს თან ახლავს თირკმლების მიერ ამინომჟავების ელიმინაციის გაზრდა. ჯანმრთელ ადამიანებში ამინომჟავების დონის მომატება გარდამავალია და ასოცირდება დიეტაში ცილების ჭარბ რაოდენობასთან.

პლაზმაში ამინომჟავების გაზრდილი დონე შეიძლება მიუთითებდეს ამინომჟავების მეტაბოლიზმის მემკვიდრეობით დარღვევებზე.

ამინომჟავების უმეტესობის განსაზღვრისთვის საუკეთესო ნიმუში არის პლაზმა. შარდში ამინომჟავების დონის განსაზღვრა განსაკუთრებით სასარგებლოა, თუ კონკრეტული დარღვევა გავლენას ახდენს თირკმლის სატრანსპორტო სისტემაზე.

როგორ მოვემზადოთ ტესტისთვის?

ჩვილებისთვის: საკვლევი მასალის აღებამდე 4 საათის განმავლობაში არ აჭამოთ პატარას.

რეკომენდებულია ნორმალური დიეტის დაცვა კვლევამდე 2-3 დღის განმავლობაში.

კვლევამდე, გაიარეთ კონსულტაცია ექიმთან იმ მედიკამენტების შეწყვეტასთან დაკავშირებით, რომლებსაც იღებთ.