СА 19-9 კარბოჰიდრატული კარცინომული ანტიგენი (სისხლი)

ზოგადი ინფორმაცია

CA 19-9 ცილაა, რომელიც წარმოიქმნება ორგანიზმში სიმსივნური პროცესის საპასუხოდ.  ჯანმრთელი ადამიანის ორგანიზმში ასეთი ტიპის ცილები დაბალი კონცენტრაციითაა. CA 19-9  ოდენობის მატება ხშირად პანკრეასის (კუჭქვეშა ჯირკვლის) სიმსივნეზე მიუთითებს, თუმცა შესაძლოა განვითარდეს ნაღვლ-კენჭოვანი დაავადების, ღვიძლის ციროზის დროს.

რადგან აღნიშნული ცილის მატება სიმსივნის გარდა ხვა პროცესებსაც ახასიათებს, ის დაავადების სასკრინინგოდ არ გამოდგება. კვლევას იყენებენ დაავადების მიმდინარეობის და მკურნალობის   მონიტორინგისთვის. ზოგიერთ შემთხვევაში, სიმსივნური პროცესი არ იწვევს აღნიშნული მარკერის მომატებას, რის გამოც მისი გამოყენება მონიტორინგისთვის უსარგებლოა.

CA 19-9 განსაზღვრა საჭიროა შემდეგი ორგანოების სიმსივნეების შემთხვევებში:

პანკრეასი

სანაღვლე გზები

სწორი ნაწლავი და კოლინჯი (მსხვილი ნაწლავი)

მუცლის ღრუ

საკვერცხეები

შარდის ბუშტი

შედეგების ინტერპრეტაცია

სიმსივნის მკურნალობის პროცესში შესაძლოა რამდენჯერმე გახდეს საჭირო CA 19-9 (ისევე როგორც სხვა მარკერების)  მაჩვენებლის განსაზღვრა, მკურნბალობის ეფექტურობის ან დაავადების პროგრესირების შესაფასებლად.

• CA 19-9 მაჩვენებლების მატება შესაძლოა მიუთითებდეს სიმსივნის ზრდაზე და/ან მკურნალობის უეფექტობაზე. საჭიროა დამატებითი კვლევები
• CA 19-9 მაჩვენებლის შემცირება მიუთიტებს მდგომარეობის დასტაბულრებაზე და/ან მკურნალობის ეფექტურობაზე.
• თუ CA 19-9 მაჩვენებელი მკურნალობის შემდეგ იკლებს მაგრამ მოგვიანებით კვლავ იზრდება, ეს შესაძლოა მიუთითებდეს დაავადების რეციდივზე ან მეტასტაზების განვითარებაზე. აუცილებელია დამატებითი კვლევების ჩატარება.

ზოგჯერ CA 19-9 მაჩვენებელი სიმსივნის გარეშეც იმატებს. თუ მარკერის მაჩვენებელი იზრდება სიმსივნის არარსებობის პირობებში, ამ მდგომარეობას მკურნალობა არ სჭირდება. CA 19-9 მომატებული კონცენტრაცია შესაძლოა მიუთითებდეს:

• პანკრეატიტზე
• სანაღვლე გზების დაავადებებზე (ბლოკადის და ინფექციების ჩათვლით)
• გასტრიტზე
• ნაღვლ-კენჭოვან დაავადებაზე
• ღვიძლის დაავადებებზე
• ცისტურ ფიბროზზე

ამ მდგომარეობებზე ეჭვის მიტანის შემთხვევაში  აუცილებელია დამატებითი ინსტრუმენტულ-ლაბორატორიული კვლევების ჩატარება.