საშარდე გზების ინფექციების პროფილი | ლაბორატორიული კვლევა

ზოგადი ინფორმაცია

საშარდე გზების ინფექცია (UTI) წარმოადგენს თირკმელების, შარდის ბუშტის ან შარდსადენი მილის ინფექციურ დაავადებას. საშარდე გზების ინფექციის (UTI) ყველაზე გავრცელებულ ტიპს წარმოადგენს ინფექციური ცისტიტი, რომელიც გამოწვეულია შარდის ბუშტის ბაქტერიული ინფიცირებით. პიელონეფრიტი წარმოადგენს თირკმელის ინფექციურ დაავადებას, რომელიც ხშირად აღმავალი ბაქტერიული ინფექციის შედეგადაა განვითარებული, ხოლო ურეთრიტი წარმოადგენს შარდსადენი მილის ინფექციის გავლენით გამოწვეულ ანთებით დაავადებას.:

საშარდე გზების ინფექციის დიაგნოსტირებისთვის გამოიყენება და საშარდე გზების ინფექციების პროფილში შედის შემდეგი კვლევები:

• შარდის საერთო ანალიზი არის ყოვლისმომცველი კვლევა, რომლის დროსაც დგინდება შარდის ზოგადი თვისებები, მისი ფიზიკოქიმიური მახასიათებლები და ტარდება ნალექის მიკროსკოპია.

ანალიზისას მოწმდება შარდის ფერი, გამჭვირვალობა, ხვედრითი წონა, მჟავიანობის ინდექსი (pH), აგრეთვე ცილის, ნაღვლის პიგმენტების, გლუკოზის, კეტონური სხეულებისა და ჰემოგლობინის არსებობა. გარდა ამისა, ტარდება შარდის ნალექის მიკროსკოპია – არაორგანული ნივთიერებებისა და სისხლის უჯრედების – ერითროციტების, ლეიკოციტების და საშარდე გზების ამომფენი უჯრედების ხარისხობრივი და რაოდენობრივი განსაზღვრა.

• შარდის მიკროსკოპული გამოკვლევა ტარდება სუფთა შარდის ნალექზე, გამოყოფიდან მაქსიმუმ 4 საათის შემდეგ. მიკროსკოპიის მიზანია ლეიკოციტების, ერითროციტების, საშარდე გზების ამომფენი ეპითელური უჯრედების, მარილების, ბაქტერიების, ცილინდრების, სოკოების და სხვა არაორგანული ნივთიერებების ხარისხობრივი და რაოდენობრივი განსაზღვრა.
• სისხლის საერთო ანალიზი გამოიყენება ჯანმრთელობის ზოგადი მდგომარეობის შესაფასებლად. ის ასევე შეიძლება იყოს დიაგნოზის მაჩვენებელი მრავალი დაავადების შემთხვევაში, როგორიცაა ანემია, ანთებითი მდგომარეობები, ლეიკემია და სხვა.ექიმი გამოიყენებს აღნიშნულ კვლევას ზედა ტრაქტის საშარდე ინფექციების იდენტიფიცირებისათვის.

ერითროციტების დალექვის სიჩქარე – ედს-ი (ESR) – პირდაპირპროპორციულია ერითროციტების მასის, ერითროციტებისა და პლაზმის სიმკვრივის სხვაობის და უკუპროპორციულია პლაზმის სიბლანტისა. ლეიკოციტოზთან და ლეიკოციტების ფორმულის შესაბამის ცვლილებებთან ერთად, გაზრდილი ედს-ი არის ორგანიზმში ინფექციური და ანთებითი პროცესების არსებობის საიმედო ნიშანი. აუტოიმუნური დაავადებების დროს ედს-ის გაზომვა საშუალებას იძლევა განვსაზღვროთ დაავადების ეტაპი (გამწვავება ან რემისია), შევაფასოთ მისი აქტივობა და მკურნალობის ეფექტურობა. ამასთან, ედს– ის მომატება არ არის ამა თუ იმ დაავადების სპეციფიური მაჩვენებელი. ამის მიუხედავად, პათოლოგიაში მის ცვლილებებს აქვს დიაგნოსტიკური და პროგნოზული მნიშვნელობა და შეიძლება მკურნალობის ეფექტურობის მაჩვენებელი გახდეს.

• შარდის კულტურა (უროკულტურა/ბაქტერილოგიური გამოკვლევა) არის ანალიზი, რომლის დროსაც მასალა შარდის ნიმუშიდან ითესება ბაქტერიოლოგიურ ნიადაგზე, რათა აღმოვაჩინოთ და განვსაზღვროთ ბაქტერიები, რომლებიც იწვევენ საშარდე გზების ინფექციებს (სგი).

აქციის ფარგლებში  შეგიძლიათ ჩაიტაროთ “საშარდე გზების ინფექციების პროფილი” 98 ლარად, ნაცვლად 123 ლარისა

როდის ჩავიტაროთ გამოკვლევა?

საშარდე გზების ინფექცია ნებისმიერს შეიძლება დაემართოს, მაგრამ უფრო ხშირია ქალებში. ეს იმიტომ ხდება, რომ ქალებში შარდსადენი (მილაკი, რომელიც შარდს გამოიტანს) უფრო მოკლეა და ანუსთან ახლოს, სადაც გავრცელებულია E. coli ბაქტერია. ხანდაზმულებს ასევე აქვთ ცისტიტის განვითარების მაღალი რისკი. ეს გაზრდილი რისკი შეიძლება გამოწვეული იყოს შარდის ბუშტის არასრული დაცლით.

საშარდე გზების ინფექციის (UTI) სიმპტომები:
საშარდე გზების ინფექცია იწვევს საშარდე გზების ლორწოვანი გარსის სიწითლეს და გაღიზიანებას (ანთებას), რამაც შეიძლება გამოიწვიოს შემდეგი სიმპტომები:
• ტკივილი ფერდქვეშა,მუცლის ან მენჯის არეში.
• გახშირებული შარდვა,შარდის შეუკავებლობა.
• მტკივნეული შარდვა (დიზურია) და სისხლი შარდში.
• ღამით შარდვა
• მომატებული მგრძნობელობა კოსტოვერტებრალურ კუთხეში
• ზურგის ტკივილი

სხვა სიმპტომები, რომლებიც შეიძლება დაკავშირებული იყოს საშარდე გზების ინფექციასთან, მოიცავს:
• ტკივილი სექსის დროს.
• ცხელება
• დაღლილობა.
• ღებინება.
• ფსიქიკური ცვლილებები ან დაბნეულობა.

რისკ-ფაქტორები:
• სექსუალური აქტივობა
• სპერმიციდების გამოყენება
• პოსტ-მენოპაუზის პერიოდი
• UTI-ების დადებითი ოჯახური ანამნეზი
• რეციდიული UTI-ის ანამნეზი
• უცხო სხეულის არსებობა
• სუსტი რისკ-ფაქტორები
• ინსულინ-დამოკიდებული დიაბეტი
• ცხოვრების განმავლობაში გადატანილი საშარდე გზების ინფექციების (UTI) მაღალი რიცხვი
• ბოლო დროს მიღებული ანტიბიოტიკები
• შარდის ბუშტის არასრული დაცლა
• ხანდაზმული ასაკი

საშარდე გზების ინფექციები გამოწვეულია მიკროორგანიზმებით. Escherichia coli არის 70%-დან 95% გაურთულებელი შემთხვევის მიზეზი, ხოლო Staphylococcus saprophyticus – 5%-დან 20%-ის. გაურთულებელი UTI-ის სხვა გამომწვევი პათოგენებია ენტერობაქტერიები, როგორიცაა Proteus mirabilis და Klebsiella-ს სახეობები, ენტეროკოკები, B ჯგუფის სტრეპტოკოკები, Pseudomonas aeruginosa და Citrobacter genus.

„სინევო“ შეგახსენებთ, რომ თვითმკურნალობა და თვითდიაგნოზი სახიფათოა ჯანმრთელობისთვის!

როგორ მოვემზადოთ ტესტისთვის?

ანალიზისთვის სისხლის აღება აუცილებელია უზმოდ (საკვების ბოლო მიღებიდან გასული უნდა იყოს არანაკლებ 12 საათისა).
ზოგიერთმა მედიკამენტმა შეიძლება გავლენა იქონიოს ტესტის პარამეტრების შედეგებზე, ამიტომ ანალიზისთვის მოსამზადებლად აუცილებელია ექიმთან კონსულტაცია და მისგან დეტალური მითითებების მიღება.

შარდის შეგროვებამდე აუცილებელია გარეთა სასქესო ორგანოების საფუძვლიანი ტუალეტის ჩატარება (უმჯობესია სარეცხის საპნის გამოყენება):

• ქალებში – შარდის შეგროვებამდე საჭიროა გინეკოლოგიური ტამპონის საშოში ჩასმა.
• მამაკაცებში – გარე სასქესო ორგანოების საფუძვლიანი ტუალეტი ასოს თავის გახსნით.
• ჩვილებში – სასქესო ორგანოების საფუძვლიანი ტუალეტის შემდეგ, მიზანშეწონილია შარდის შეგროვება შარდმიმღებში. საფენებიდან გამოწურული შარდის გამოკვლევა შეუძლებელია. შარდი გროვდება სპეციალურ კონტეინერში ან სუფთა გარეცხილ მინის კონტეინერში.

საკვლევი მასალა

ვენური სისხლი და შარდი.

შედეგების შესაძლო ინტერპრეტაცია

თუ ტესტმა გამოავლინა დარღვევები, შესაძლოა საჭირო გახდეს დიაგნოსტიკის დამატებითი, სხვა მეთოდების გამოყენება. ამისთვის აუცილებლად უნდა მიმართოთ ექიმ-სპეციალისტს, რომელიც სიმპტომების გათვალისწინებით სწორად შეარჩევს შესაბამის გამოკვლევებს დიაგნოზის ზუსტად დასასმელად.