ანტისპერმული ანტისხეულები (ASA)

ზოგადი ინფორმაცია

დადგენილია, რომ როგორც მამაკაცების, ისე ქალის ორგანიზმს შეუძლია ანტისპერმული ანტისხეულების გამომუშავება. აღნიშნული იმუნოლოგიური მდგომარეობა შესაძლოა უნაყოფობის მიზეზი იყოს. უშვილობის დიაგნოზების თითქმის 30% ანტისპერმული ანტისხეულების არსებობასთანაა მდაკავშირებული.

სპერმატოზოიდები იმუნური სისტემისგან იზოლირებულია ე.წ ჰემატო-ტესტიკულური ბარიერით. ბარიერის დაზიანბას ადგილი აქვს: ტრავმის, ვაზექტომიის, ეპიდიდიმის ობსტრუქციის და ინფექციების დროს, რის შედეგადაც სპერმატოზოიდები ხვდება სისხლის ცირკულაციაში და იწვევს იმუნურ რეაქციებს. ქალის ორგანიზმში ანტისპერმული იზო-ანტისხეულების განვითარების მექანიზმი ბოლომდე დაუზუსტებელია. არსებული მონაცემებით, ზოგიერთი ვირუსული ან ბაქტერიული პროცესის საპასუხოდ განვითარებულ ანტისხეულებს, შესაძლოა ქონდეს ჯვარედინი რეაქცია სპერმის ანტიგენებთან. ანტისპერმული ანტისხეულები შესაძლოა აუტოიმუნურ პროცესებთანაც იყოს ასოცირებული.

კლინიკური მნიშვნელობა გააჩნია პლაზმური მემბრანის საწინააღმდეგო ანტისპერმულ ანტისხეულებს. ისინი გავლენას ახდენს სპერმატოზიოდების მოძრაობის უნარზე და ამგვარად განაყოფიერების პროცესზეც.

როდის ტარდება კვლევა?

უნაყოფობის დიაგნოსტირებისას, შემდეგ შემთხვევებში:

მამაკაცებში:

• სპერმატოზოიდების აგლუტინაცია ეაკულატში
• სათესლეების ტრავმის ან ბიოფსიის ანამნეზი
• ვაზექტომია
• გენიტალური ინფექციები
• სათესლე სადინრების ობსტრუქციული დაავადებები

ქალებში:

• პათოლოგიური პოსტკოიტალური ტესტი (სქესობრივი კავშირის შემდეგ საშვილოსნოს ყელის ლორწოში მოძრავი სპერმატოზოიდები არ აღმოჩნდება)
• გენიტალური ინფექციები
• უნაყოფობის სხვა მიზეზების არარსებობა

პაციენტის მომზადება: საჭირო არ არის

საკვლევი მასალა: ვენური სისხლი

რეფერალური ნორმა:  0-60 R.U./მლ (ფარდობითი ერთეული/მლ)