ჰისტონის აუტო-ანტისხეულები IgG

ზოგადი ინფორმაცია

ჰისტონები ცილებია, რომლებიც მნიშვნელოვან როლს ასრულებს  დნმ-ის ორგანიზებაში და უჯრედული ქრომატინის ჩამოყალიბებაში. ჰისტონები უხვად შეიცავს ამინომჟავა არგინინს და ლიზინს.

ჰისტონების ხუთი კლასი არსებობს: H1, H2A, H2B, H3, H4. ჰისტონების ხუთივე კლასი, ისევე როგორც დნმ-ჰისტონის კომპლექსი ზოგჯერ წარმოადგენს იმუნური სისტემის მიერ  აუტოანტისხეულების წარმოქმნის სამიზნეს.

ანტი-ჰისტონური აუტოანტისხეულები გვხვდება მედიკამენტით ინდუცირებული წითელი მგლურას შემთხვევათა 95%-ში და მნიშვნელოვან სადიაგნოსტიკო კრიტერიუმს წარმოადგენს.

წამლით ინდუცირებული წითელი მგლურა მიმდინარეობით სისტემური წითელი მგლურას მსგავსია, თუმცა არ იწვევს თირკმლის და ნერვული სისტემის დაზიანებას და არ არის ასოცირებული ორჯაჭვიანი დნმ-ის საწინააღმდეგო აუტოანტისხეულებთან.

წამალ-ინდუცირებული მგლურას განვითარებას იწვევს შემდეგი ჯგუფის მედიკამენტები: პროკაინამიდი, ჰიდრალაზინი, იზონიაზიდი, კარბამაზეპინი, პენიცილამინი, ქლორპრომაზინი, ალფა-მეთილდოფა, ქინიდინი, სულფასალაზინი, მინოციკლინი.

ანტიჰისტონური ანტისხეულები აღმოჩენილია ასევე სისტემური წითელი მგლურას 30-60%-ში, ხშირად ორჯაჭვიანი დნმ-ის საწინააღმდეგო აუტოანტისხეულებთან ერთად.

ანტიჰისტონურ აუტოანტისხეულებზე დაყრდნობით, ზოგჯერ ვერ ხერხდება სისტემური წითელი მგლურის და წამლით ინდუცირებული მგლურის დიფერენცირება.  თუმცა, წამლით ინდუცირებული მგლურას დროს, ანტიჰისტონური ანტისხეულები წარმოდგენილია იზოლირებულად, ორჯაჭვიანი დნმ-ის საწინააღმდეგო აუტოანტისხეულების გარეშე.

პაციენტის მომზადება: საჭირო არ არის.

საკვლევი მასალა: ვენური სისხლი

შედეგების ინტერპრეტაცია

ანტი-ჰისტონური ანტისხეულების პოზიტიური შედეგი, ორჯაჭვიანი დნმ-ის ანტისხეულების ნეგატიური მაჩვენებლის ფონზე – წამლით ინდუცირებული წითელი მგლურის სასარგებლოდ მეტყველებს.

ანტი-ჰისტონური ანტისხეულების და ორჯაჭვიანი დნმ-ის ანტისხეულების პოზიტიური მაჩვენებლები – სისტემური წითელი მგლურისთვისაა დამახასიათებელი.

ანტიჰისტონური ანტისხეულები შესაძლოა განვიტარდეს ისეთი პათოლოგიების დროსაც, როგორიცაა:

• რევმატოიდული ართრიტი:
• სისტემური სკლეროზი
• იუვენილური ართრიტი
• ღვიძლის აუტოიმუნური დაავადებები: პირველადი ბილიარული ციროზი და აუტოიმუნური ჰეპატიტი

იშვიათ შემთხვევებში ანტი-ჰისტონური ანტისხეულები ვლინდება პაციენტებში, სისტემური წითელი მგლურის ან წამლით ინდუცირებული მგლურის სიმპტომების გარეშე.