ერითროციტების საწინააღმდეგო ანტისხეულები ორსულებში

ზოგადი ინფორმაცია

ორსულობისას რუტინული ანტიერითროციტული ანტისხეულების კვლევის  მიზანია:

• რეზუს-უარყოფითი ორსულების იდენტიფიკაცია, რომლებიც საჭიროებენ ანტირეზუს D იმუნოგლობულინით პროფილაქტიკას
• ანტი-ერითროციტული ანტისხეულების იდენტიფიკაცია
• იმ ორსულების გამოვლენა, რომელთაც აქვთ ნაყოფისა და ახალშობილის ჰემოლიზური დაავადების განვითარების რისკი

როდესაც დედის და ნაყოფის რეზუსი განსხვავდება – განსხვავებულია მათი სისხლის უჯრედების ანტიგენებიც. ეს იწვევს რეზუს უარყოფითი დედის იმუნური სისტემის სენსიბილიზაციას და რეზუს დადებითი ნაყოფის ერითროციტების საწინააღმდეგო IgG ანტისხეულების წარმოქმნას. ეს ანტისხეულები გადის პლაცენტის ბარიერს და ნაყოფის სისხლში იწვევს ერითროციტების დაშლას (ერითროციტულ ანტიგენებთან ურთიერთქმედების შედეგად).

სისხლის ჯგუფის ანტიგენებს შორის ყველაზე გავრცელებულია რეზუს ანტიგენები. რამდენიმე ტიპის რეზუს ანტიგენი არსებობს: C, c, D, E, e. დედის იმუნური რეაქციების გამომწვევი ყველაზე ხშირად არის D ანტიგენი. მართალია ანტი-D პროფლაქტიკით ბევრად შემცირებულია ნაყოფისა და ახალშობილის ჰემოლიზური დაავადების სიხშირე, თუმცა, ეს პრობლემა მაინც რჩება.

ტესტი იკვლევს შემდეგი ერითროცირული ანტიგენების მიმართ ანტისხეულებს:

D, C, Cw, E, c, e, K, k, Kpb, Fya, Fyb,  Lua, Lub, Jka, Jkb, Jsb, M, N, S,s, Lea, Leb, P1, Xga, Coa.

ევროპის, ავსტრალიისა და ჩრდილოეთ ამერიკის მეან-გინეკოლოგთა კლინიკური გაიდლაინების რეკომენდაციით ანტიერითროციტული ანტისხეულების ტესტი პირველად ტარდება პირველი სამეანო ვიზიტის დროს პირველ ტრიმესტრში. განმეორებითი კვლევა ტარდება 28 კვირაზე. თუ ამ ვადაზე დაფიქსირდა  ანტისხეულების  მაღალი  ტიტრი, მაშინ კვლევის განმეორება აუცილებელია ყოველ 4 კვირაში ერთელ და მშობიარობამდე 2 კვირით ადრე.

რეზუს D უარყოფით ორსულებს, ანტი-D-იზოიმუნიზაციის გარეშე, ჩაუტარდებათ პროფილაქტიკური მკურნალობა ორსულობის 28-ე და 30-ე კვირებს შორის პერიოდში და მშობიარობიდან 72 საათში (თუ ნაყოფი რეზუს D დადებითია).

პაციენტის მომზადება

სპეციფიკური მომზადება საჭირო არ არის.

კვლევისთვის ივსება სპეციალური შესავსები ფორმა, რომელშიც უნდა დაფიქსირდეს ჩატარებული აქვს თუ არა პაციენტს ანტი-D იმუნიზაცია უკანასკნელ 8 კვირაში.

საკვლევი მასალა: ვენური სისხლი