ვიტამინი H | ლაბორატორიული კვლევა

ზოგადი ინფორმაცია

ვიტამინი H, იგივე ბიოტინი, იგივე ვიტამინი B7 – წყალში ხსნადი ვიტამინია, რომელიც B კომპლექსის შემადგენლობაში შედის. სხვა ვიტამინებისგან  განსხვავებით, რომლებსაც ორგანიზმი საკვებიდან იღებს, ბიოტინი გამომუშავდება მსხვილ ნაწლავში, ბაქტერიული ფლორის მონაწილეობით.  ბიოტინი თამაშობს მნიშვნელოვან როლს CO2-ის ლიპიდების, ნახშირწყლების და პროტეინების მეტაბოლიზმში ჩართვაში და ასრულებს ფერმენტის კოფაქტორის (კატალიზატორის) ფუნქციას.

ბიოტინი ასევე მონაწილეობს ნიაცინის (ვიტამინი B3)  მეტაბოლიზმში, ამინომჟავების დეგრადაციის პროცესებში, პურინების (ნუკლეინის მჟავების პროდუქტი) წარმოქმნაში და სხვა.

A, B2, B6 ვიტამინებთან ერთად  ის ასევე იცავს კანსა და თმას. ვიტამინი H ხელს უშლის ქოლესტეროლის დაგროვებას სისხლძარღვების ენდოთელიუმში, მონაწილეობს ასევე ტოქსიკური სუბსტანციების და მეტაბოლიტების გამოყოფაში, რითაც ხელს უწყობს ღვიძლისა და ნაღვლის ბუშტის გამართულ ფუნქციონირებას.

გიოტინი აუმჯობესებს მეხსიერებას;  ის გამოიყენება ალკოჰოლიზმის, ათეროსკლეროზის, ჰიპერქოლესტერინემიის, დიაბეტის, ღვიძლის გაცხიმოვნების, კუჭ-ნაწლავის ტრაქტის დაავადებების, წონის კორექციის კომპლექსურ მკურნალობაში.

ვიტამინი H შემცველი პროდუქტებია: ხორცი, განსაკუთრებით ღვიძლი და თირკმელი, რძის პროდუქტები, კვერცხის ყვითრი, ზღვის პროდუქტები, თევზი, ავოკადი, ბანანი, მარწყვი, პარკოსნები, თხილიეული, ციტრუსები, მარცვლეული და სხვა. ვიტამინი H (ბიოტინი, ვიტამინი B7) თერმომედეგია, თუმცა მგრძნობიარეა ჯანგბადის და სინათლის მიმართ.

ვიტამინი H რეკომენდებული დღიური დოზა ჯანმრთელი ზრდასრულებისთვის შეადგენს  300 ნგ, ხოლო ორსულების და ლაქტაციის პერიოდში მყოფი დედებისთვის 350 ნგ.

ორგანიზმში ვიტამინი H დეფიციტი იშვიათია, თუმცა, როგორც წესი საკვებში მის ნაკლებობას ან მალაბსორბციას (შეთვისების დარღვევას) უკავშირდება. ვიტამინი H მეტაბოლიზმის დარღვევა ძირიტადად დაკავშირებულია ფერმენტების გენეტიკურ დეფიციტთან.  ბიოტინის მეტაბოლიზმის დარღვევის ყველაზე გავრცელებული მიზეზია ფერმენტების, – ბიოტინიდაზას და ჰოლოკარბოქსილაზ-სინთეტაზას დეფიციტი.

ბიოტინზე დამოკიდებული ფერმენტების –  პირუვატ-კარბოქსილაზას, პროპიონილ-CoA კარბოქსილაზას, მეთილკროტონილ-CoA კარბოქსილაზას და აცეტილ-CoA კარბოქსილაზას დეფიციტი იწვევს კარბოქსილაზების მრავლობით დეფიციტს, რაც სიცოცხლისათვის სახიფათო პათოლოგიებს იწვევს. ბიოტინის მიწოდების დარღვევა შეუქცევად მენტალურ და ნევროლოგიურ  დარღვევებს იწვევს.

სიმპტომები

სისუსტე

ანორექსია

გულისრევა

ღებინება

ანემია

ალოპეცია (გამელოტება)

სებორეული დერმატიტი

ძალიან მშრალი ან ძალიან ცხიმიანი კანი

პირისა და ხახის ლორწოვანის დაზიანებები

გლოსიტი

მიალგია (კუნთების ტკივილი)

ჰიპერესთეზია (პათოლოგიურად გაძლიერებული მგრძნობელობითი აღქმა)

კონიუნქტივიტი

დეპრესიული ეპიზოდები

გულყრები

საკვლევი მასალა: ვენური სისხლი

წინასწარი მომზადება: კვლევა ტარდება უზმოდ. კვლევის ჩატარებამდე 24 საათის განმავლობაში ალკოჰოლის მიღება არ არის რეკომენდებული

რეფერენტული ნორმა:   >200 ნგ/ლ

შედეგების ინტერპრეტაცია: პლაზმის ბიოტინის  ნორმაზე დაბალი მაჩვენებელი მალნუტრიციის ან ბიოტინის მეტაბოლიზმში მონაწილე ფერმენტების დეფიციტზე შეიძლება მიუთითებდეს. ანტიბიოტიკები და ანტიკონვულსანტები ამცირებს პლაზმაში ბიოტინის შემცველობას