მიკოპლაზმა გენიტალიუმი/მიკოპლაზმა ჰომინის | პჯრ

Mycoplasma genitalium იწვევს საშარდე გზების ანთებით დაავადებებს – ურეთრიტს – მამაკაცებში და ქალებში და ცერვიციტს და ვაგინოზს ქალებში. ზოგიერთ შემთხვევაში ინფექციამ შეიძლება გამოიწვიოს მენჯის ანთებითი დაავადება.

13. genitalium გვხვდება იმ მამაკაცების 13.6%-ში, რომლებიც აფიქსირებენ ურეთრიტის სიმპტომებს (შემთხვევების 88%-ში ის გვხვდება, როგორც ერთადერთი გამომწვევი აგენტი), ხოლო ქალებში ურეთრიტის ან/და ცერვიციტის სიმპტომებისას, გვხვდება M. genitalium შემთხვევების 12,3%-ში (შემთხვევების 93,7%-ში გვხვდება როგორც ერთადერთი გამომწვევი).

სიმპტომები განსხვავდება მდგომარეობის მიხედვით:

ურეთრიტი – ტკივილი და წვა შარდვისას, ქავილი და გაღიზიანება, სიმძიმე სათესლე ჯირკვლებში (მამაკაცებში);

ცერვიციტი, ვაგინოზი – ვაგინალური გამონადენი, ტკივილი სქესობრივი აქტის დროს, სისხლდენა სქესობრივი აქტის შემდეგ, სისხლდენა რეგულარულ მენსტრუალურ პერიოდებს შორის;

მენჯის ანთებითი დაავადება – შეიძლება განვითარდეს ქალებში გენიტალური ინფექციების დროს. ჩივილები მოიცავს სიმძიმეს და ტკივილს მუცლისა და ზურგის ქვედა ნაწილში და ზოგჯერ ცხელებას, რომელიც შეიძლება განვითარდეს ერთდროულად ცერვიციტის და ვაგინოზის სიმპტომებთან ერთად. ინფექციამ შეიძლება გამოიწვიოს უნაყოფობა, ნაადრევი მშობიარობა და მუცლის მოშლა;

Mycoplasma genitalium-ით გამოწვეული ინფექციის დიაგნოსტიკის ყველაზე გავრცელებულ მეთოდად მიიჩნევა მოლეკულური დიაგნოსტიკის მეთოდი – პოლიმერაზული ჯაჭვური რეაქცია (PCR). ეს მეთოდი იძლევა მოკლე დროში მაღალი დიაგნოსტიკური მგრძნობელობით და სპეციფიურობით Mycoplasma genitalium-ის იდენტიფიცირებისა და მკურნალობის დანიშვნის საშუალებას.

საკვლევი მასალა

პჯრ დიაგნოსტიკისთვის რეკომენდებულია:

• მამაკაცებში დილის შარდის პირველი ნაწილის გამოყენება. ეს არის ყველაზე ოპტიმალური მასალა, რომლის შემთხვევაშიც დიაგნოსტიკური მგრძნობელობა აღწევს 85%-95%-ს.
• ქალებში შარდის პირველი ნაწილის გამოყენებას აქვს უფრო დაბალი დიაგნოსტიკური მგრძნობელობა (დაახლოებით 80-90%), ვიდრე მამაკაცებში, ამიტომ ქალების შემთხვევაში უროგენიტალური ნაცხი აღიარებულია ტესტირებისთვის ყველაზე ოპტიმალურ მასალად. ქალებში შარდის პირველი ნაწილის შესწავლა შეიძლება გამოყენებულ იქნას ისეთ სიტუაციებში, როდესაც ძნელია საშოდან და საშვილოსნოს ყელიდან ნაცხის აღება (მაგალითად, ორსულ ქალებში) ან სახეზეა ცისტიტის კლინიკა (მათ შორის ქრონიკული). ქალების გამოკვლევის ყველაზე ოპტიმალური დროა ბოლო მენსტრუაციის პირველი დღიდან მეოთხე კვირა.
• ნაცხის ასაღები ჯაგრისი და ეპენდორფი სატრანსპორტო სითხით შეგიძლიათ აიღოთ სინევოს ფილიალებში.
• ნაცხის ასაღებად მიმართეთ ექიმ-სპეციალისტს (უროლოგი, გინეკოლოგი).

საკვლევი მასალა ლაბორატორიაში უნდა მოიტანოთ 13:00 სთ მდე.

როგორ მოვემზადოთ ტესტისთვის?

ნაცხის აღებამდე:

• არ გამოიყენოთ ვაგინალური შხაპი;
• რეკომენდებულია სქესობრივი კავშირისგან თავის შეკავება არანაკლებ 24-48 საათის განმავლობაში;
• არ მოშარდოთ უშუალოდ ნაცხის აღებამდე;
• კონტრაცეპტივების გამოყენება სამი დღით ადრე უნდა შეწყდეს;
• ნაცხის აღება ხდება კოლპოსკოპიიდან 24-48 საათის შემდეგ და საშოს ულტრაბგერითი გამოკვლევიდან – 24 საათის შემდეგ;

• ჩაიტარეთ გარე სასქესო ორგანოების ჰიგიენური პროცედურები საპნის და სხვა სარეცხი საშუალებების გამოყენების გარეშე;
• ტესტი შეიძლება ჩატარდეს არა უადრეს 10-14 დღისა ანტიბაქტერიული, ანტიფუნგალური ან ადგილობრივი ანტისეპტიკების მიღების დასრულებიდან;
• რეკომენდებულია ტესტის ჩატარება ოვულაციის დროს ან უროგენიტალური ტრაქტის ანთებითი დაავადების სიმპტომების არსებობისას.
• მენსტრუალური სისხლდენის დროს გამოკვლევა არ ტარდება.
• კვლევა ტარდება მიკროორგანიზმების შემცველი პრეპარატების (პრობიოტიკები, ევბიოტოცი) მიღებიდან 2 კვირის შემდეგ.